राम प्रकाश बिक, जुम्ला, ११ साउन । जुम्लाको कनकासुन्दरी गाउँपालिकामा आँगनमा अचेत अवस्थामा फेला परेका एक युवकको उपचारका क्रममा नेपालगञ्जमा मृत्यु भएको छ।
जिल्ला प्रहरी कार्यालय जुम्लाका अनुसार कनकासुन्दरी गाउँपालिका–८ भण्डारीवाडा बस्ने पदम भण्डारीका २२ वर्षीय छोरा सन्त बहादुर भण्डारीको उपचारका क्रममा नेपालगञ्ज न्यूरो मेडिकलमा मृत्यु भएको हो।
प्रहरीका अनुसार गत साउन ६ गते राति करिब ९:०० बजे सन्त बहादुर भण्डारी आफ्ना साथीहरू—२१ वर्षीय अनिल भण्डारी, १८ वर्षीय गोपाल सार्की र ३३ वर्षीय जीवन बुढासँगै मापसे (मादक पदार्थ सेवन) गरी अनिल भण्डारीको घरमा सुतेका थिए।
भोलिपल्ट साउन ७ गते बिहान ८:०० बजेको समयमा सन्त बहादुर भण्डारी घरको आँगनमा अचेत (बेहोस) अवस्थामा फेला परेका थिए। उनको नाक र मुखबाट रगत बगिरहेको अवस्थामा भेटिएपछि तत्काल उपचारका लागि कर्णाली स्वास्थ्य विज्ञान प्रतिष्ठान, जुम्ला पुर्याइएको थियो।
जुम्लामा उपचार सम्भव नभएपछि र अवस्था थप गम्भीर बन्दै गएपछि उनलाई नेपाली सेनाको हेलिकप्टरमार्फत उद्धार गरी नेपालगञ्ज न्यूरो मेडिकलमा लगिएको थियो। उपचाररत भण्डारीलाई आज साउन ११ गते बिहान ९:०० बजे चिकित्सकले मृत घोषणा गरेको जिल्ला प्रहरी कार्यालय जुम्लाका प्रवक्ता प्रहरी निरीक्षक शालिकराम खनालले जानकारी दिएका छन्।
घटनाबारे थप अनुसन्धान भइरहेको प्रहरीले जनाएको छ।
