राम प्रकाश बि.क,जुम्ला साउन ८ गते । ’दोस्रो बृहत् कृषि, पर्यटन, व्यापार तथा सांस्कृतिक महोत्सव २०८३’ जुम्लामा भदौ ७ गतेदेखि सञ्चालन हुने भएको छ। राष्ट्रिय लोक तथा दोहोरी गीत प्रतिष्ठान जुम्लाले शुक्रबार सदरमुकाममा पत्रकार सम्मेलन गरी भदौ १६ गतेसम्म चल्ने महोत्सवको तयारी तीव्र पारिएको जानकारी दिएको हो।
महोत्सवका लागि प्रशासनिक तथा कानुनी प्रक्रियाहरू पूरा भइसकेको प्रतिष्ठानका अध्यक्ष विश्वराज खत्रीले जानकारी दिनुभयो। उहाँका अनुसार चन्दननाथ नगरपालिका वडा नम्बर ५ को सिफारिसका आधारमा शान्ति सुरक्षाका लागि जिल्ला प्रशासन र प्रहरी कार्यालय जुम्लासँग आवश्यक समन्वय भइसकेको छ।
प्रतिष्ठानका निवर्तमान अध्यक्ष एवं महोत्सव संयोजक कर्णबहादुर बुढ्थापाले नयाँ भवन व्यवस्थापन र पूर्वाधार विकासका लागि कोष जुटाउन महोत्सव आयोजना गर्न लागिएको बताउनुभयो। गत वर्षका कमीकमजोरी सच्याउँदै यसपटक स्थानीय र राष्ट्रिय स्तरका कलाकारहरूको प्रस्तुति रहने उहाँको भनाइ छ।
उद्योग वाणिज्य संघले पनि सोही अवधि आसपास महोत्सव गर्ने चर्चा चलेका बेला, प्रतिष्ठानले आफूले सम्पूर्ण कानुनी प्रक्रिया पूरा गरिसकेकाले यस वर्ष आयोजनामा सहयोग गरिदिन सबै पक्षसँग आग्रह गरेको छ।
’राष्ट्रको गौरव तथा पहिचान, लोककला संस्कृतिको संरक्षण’ भन्ने मूल नाराका साथ हुन लागेको महोत्सवलाई सफल बनाउन प्रतिष्ठानले स्थानीय तह, व्यवसायी, सञ्चारकर्मी र आम नागरिकसँग सहयोगको अपिल गरेको छ।
