सागर बि.क ,​जाजरकोट, जेठ १३ । ​जाजरकोट जिल्लाको विकास र सुशासनमा जुनीचाँदे गाउँपालिकाले ऐतिहासिक फड्को मारेको छ। जिल्लामै पहिलो पटक आफ्नै ‘गाउँ प्रहरी’ परिचालन गर्ने तयारी पूरा गर्दै जुनीचाँदेले स्थानीय सरकार सञ्चालनमा नयाँ नजीर बसालेको छ।

​

जनहितकारि सुचना

​नेपालको संविधान र स्थानीय सरकार सञ्चालन ऐन, २०७४ ले स्थानीय तहलाई आफ्नो क्षेत्राधिकारभित्र शान्ति–सुव्यवस्था कायम गर्न र आवश्यक सुरक्षा व्यवस्था मिलाउन दिएको अधिकारलाई टेकेर गाउँपालिकाले यो कदम चालेको हो। पालिकाले छुट्टै कानुन निर्माण गरी पारदर्शी प्रक्रियाबाट जनशक्ति छनोट गरेको छ।

​

​गाउँपालिकाले गत वैशाख २९ गते सार्वजनिक सूचनामार्फत सुरु गरेको भर्ना प्रक्रियाबाट ७ जना दक्ष जनशक्ति छनोट गरेको छ। गाउँपालिकाले ​१ जना वरिष्ठ हवलदार र ​६ जना प्रहरी जवान भर्ना गरेको छ।

​हाल छनोटमा परेका यी जनशक्तिहरूलाई जिल्ला प्रहरी कार्यालय जाजरकोटको विशेषज्ञ टोली (प्रहरी नायब निरीक्षक र प्रहरी सहायक निरीक्षक किरण राना मगरको नेतृत्वमा) बाट आधारभूत तालिम दिइरहेको छ।

​के–के हुनेछन् गाउँ प्रहरीको जिम्मेवारी?

​गाउँपालिकाका प्रमुख प्रशासकीय अधिकृत रेशम महताराका अनुसार, यी प्रहरीहरूले कानुन कार्यान्वयनको ‘फिल्ड लेभल’ मा  गाउँपालिकाका सार्वजनिक भौतिक पूर्वाधार र सम्पत्तिको संरक्षण, स्थानीय सभा–समारोह, जात्रा, पर्व र मेला–पातमा शान्ति सुरक्षा कायम गर्ने, स्थानीय बजार व्यवस्थित गर्ने र पार्किङस्थलको निगरानी गर्ने र गाउँपालिकाले बनाएका सरसफाइ मापदण्ड, नियम र नीतिहरूको प्रभावकारी कार्यान्वयन गराउने लगायतका महत्वपूर्ण काम गर्ने भएका छन्।

​

​गाउँपालिकाका उपाध्यक्ष बिरेन्द्र बहादुर शाहीका अनुसार, यो केवल प्रहरी भर्ना मात्र नभएर पालिकामा अमनचयन सुनिश्चित गर्ने र सेवा प्रवाहलाई थप चुस्त बनाउने रणनीति हो। जिल्लाका अन्य स्थानीय तहका लागि पनि यो एउटा अनुकरणीय अभ्यास बन्न पुगेको छ।

​स्थानीय सरकारले आफ्नो अधिकार क्षेत्रभित्र रहेर निर्माण गरेको यो सुरक्षा संरचनाले भोलिका दिनमा जाजरकोटको सुशासन र स्थानीय विकासमा प्रत्यक्ष सकारात्मक प्रभाव पार्ने अपेक्षा गरिएको छ।