जुम्ला । जिल्ला ट्राफिक प्रहरी कार्यालय जुम्लामा कार्यरत प्रहरी नायब निरीक्षक (सई) प्रकाश बहादुर शाही २०८३ सालको वैशाख महिनाको ‘सर्वोत्कृष्ट ट्राफिक प्रहरी’ घोषित भएका छन्।

​नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय, वीरेन्द्रनगर, सुर्खेतले सई शाहीको उत्कृष्ट कार्यसम्पादनको कदर गर्दै उनलाई सो सम्मान प्रदान गरेको हो।

जनहितकारि सुचना

​

​कार्यालयका अनुसार, सई शाहीले आफ्नो जिम्मेवारी निर्वाहका क्रममा देखाएको सक्रियता र कुशलताका कारण उनी यो सम्मानका लागि छनोट भएका हुन्। उनले गरेका

​ ट्राफिक व्यवस्थापनलाई चुस्त बनाउँदै दुर्घटना दर घटाउन खेलेको प्रभावकारी भूमिका, विशेष गरी दुर्गम तथा ग्रामीण क्षेत्रका विद्यालय र समुदायमा पुगेर सडक सुरक्षासम्बन्धी जनचेतना फैलाउन उनले पुर्‍याएको योगदान, बढ्दो सवारी चापका बाबजुद सडक अनुशासन कायम राख्न र ट्राफिक व्यवस्थापनलाई व्यवस्थित बनाउन देखाएको व्यावसायिकता,​ स्थानीय तह, विद्यालय र नागरिक समाजसँग समन्वय गरी सुरक्षित यात्राका लागि निरन्तर खटिएकोले ​’सर्वोत्कृष्ट ट्राफिक प्रहरी छनोट मार्गदर्शन–२०८१’ को मापदण्ड र मूल्याङ्कनको आधारमा उनलाई वैशाख महिनाको उत्कृष्ट प्रहरी घोषित गरिएको कार्यालयले जनाएको छ।

​

​यो सम्मान प्राप्त भएपछि उत्साहित देखिएका सई शाहीले आफ्नो मेहनतको कदर हुनु खुसीको विषय भएको बताएका छन्। उनले भने, “यस सम्मानले मलाई थप जिम्मेवार भएर काम गर्ने प्रेरणा र उच्च मनोबल प्रदान गरेको छ। आगामी दिनमा पनि सडक सुरक्षा र ट्राफिक व्यवस्थापनलाई अझ बढी प्रभावकारी बनाउन म प्रतिबद्ध छु।”

​दुर्गम जिल्ला जुम्लाको कठिन भूगोलमा रहेर पनि ट्राफिक व्यवस्थापनमा उनले देखाएको सक्रियताले आम नागरिकमा प्रहरीप्रतिको विश्वास थप बढाएको छ।