जुम्ला । कर्णाली राजमार्गको सुरक्षा अवस्था सुदृढ बनाउन र जुम्ला लगायतका दुर्गम क्षेत्रमा प्रहरीको उपस्थिति प्रभावकारी बनाउन पहल सुरु भएको छ। जुम्लाबाट समानुपातिक पूर्व सांसद छिरिङ लामु लामा र नेपाल प्रहरीका महानिरीक्षक (आईजीपी) दानबहादुर कार्कीबीच भएको विशेष छलफलपछि प्रहरीले तत्काल केही आवश्यक स्रोतसाधन उपलब्ध गराउने प्रतिबद्धता जनाएको हो।
प्रहरी प्रधान कार्यालयमा करिब दुई घण्टा भएको विस्तृत छलफलमा पूर्व सांसद लामाले कर्णालीमा कार्यरत प्रहरी कर्मचारीहरूले न्यून स्रोतसाधन, कमजोर पूर्वाधार र जनशक्तिको अभावबीच पनि उच्च जोखिम मोलेर सेवा प्रवाह गरिरहेको विषय उठान गर्नुभएको थियो।
छलफलका क्रममा आईजीपी कार्कीले जुम्लाको सुरक्षा संवेदनशीलतालाई ध्यानमा राख्दै तत्काल एउटा ‘वान्टन’ गाडी व्यवस्था गरी पठाउने प्रतिबद्धता व्यक्त गर्नुभएको छ।
सुर्खेतदेखि नाक्चे लाग्नासम्मको कर्णाली राजमार्ग क्षेत्रमा रहेका प्रहरी बिटहरूको अवस्था अनुगमन गर्ने र त्यहाँ देखिएका समस्या समाधान गर्न आईजीपीले सक्रियता देखाउनुहुने भएको छ।
दुर्गम क्षेत्रमा प्रहरीको सेवालाई गुणस्तरीय बनाउन आवश्यक उपकरण र थप जनशक्ति व्यवस्थापनका लागि प्राथमिकता दिइने आश्वासन प्राप्त भएको छ।
भेटपछि पूर्व सांसद लामाले सामाजिक सञ्जालमार्फत जानकारी दिँदै भन्नुभयो, “जनताको सुरक्षा कमजोर हुँदा राज्य बलियो हुन सक्दैन। कर्णाली राजमार्ग र जुम्लाको सुरक्षा सुदृढीकरणका लागि मैले औपचारिक मागहरू प्रस्तुत गरेको छु।”
छलफलका क्रममा आईजीपी कार्कीले प्रहरी संगठनभित्र रहेका केही आन्तरिक समस्या र स्रोतको अभावबारे समेत अवगत गराउनुभएको थियो। सो विषयमा दुःख व्यक्त गर्दै पूर्व सांसद लामाले सम्बन्धित निकायहरूसँग आवश्यक समन्वय गर्ने प्रतिबद्धता जनाउनुभएको छ।
कर्णालीको कठिन भूगोल र चुनौतीपूर्ण सडक यात्रालाई सुरक्षित बनाउन राज्यको माथिल्लो तहबाट सुरु भएको यो सक्रियतालाई स्थानीय स्तरमा सकारात्मक रूपमा हेरिएको छ। राम प्रकाश बि.क
