काठमाडौँ । मुलुकको पछिल्लो राजनीतिक घटनाक्रमले नयाँ मोड लिएको छ। पूर्वप्रधानमन्त्री केपी शर्मा ओली र पूर्वगृहमन्त्री रमेश लेखक पक्राउ परेपछि गृहमन्त्री सुदन गुरुङले कडा प्रतिक्रिया दिँदै “कोही पनि कानुनभन्दा माथि नरहेको” स्पष्ट पारेका छन्।
पक्राउको खबरले देशैभरि हलचल मच्चाइरहेका बेला गृहमन्त्री गुरुङले सामाजिक सञ्जालमार्फत आफ्नो धारणा सार्वजनिक गरेका हुन्। उनले यो कदम कुनै राजनीतिक प्रतिशोध नभई विधिको शासन स्थापना गर्ने प्रयास भएको दाबी गरे।
गृहमन्त्रीको भनाइ: “वाचा वाचा नै हो”
गृहमन्त्री गुरुङले आफ्नो फेसबुक/ट्वीटरमा लेखेका छन्:
”वाचा वाचा नै हो। कानुनभन्दा माथि कोही छैन। पूर्वप्रधानमन्त्री केपी शर्मा ओली र निवर्तमान गृहमन्त्री रमेश लेखकलाई नियन्त्रणमा लिएका छौँ। यो कसैप्रति प्रतिशोध होइन, केवल न्यायको सुरुवात हो।”
वर्तमान सरकारले सुशासनलाई मुख्य एजेन्डा बनाएको उल्लेख गर्दै उनले थपेका छन्, “मलाई विश्वास छ, अब देशले नयाँ दिशा लिनेछ।” उच्च पदस्थ व्यक्तित्वहरूमाथिको यो कारबाहीले नेपाली राजनीतिमा ठुलो तरङ्ग उत्पन्न गरेको छ।
गृहमन्त्रीले यसलाई ‘न्यायको सुरुवात’ को रूपमा परिभाषित गरेका छन्।
पहुँच र शक्तिका आधारमा कोही पनि बच्न नसक्ने सन्देश दिने प्रयास।
दुई ठुला दलका प्रभावशाली नेताहरू पक्राउ परेपछि अबको राजनीतिक समीकरण कता जान्छ भन्ने चासो बढेको छ।
