जुम्ला, १२ चैत । कर्णालीको गौरवका रूपमा रहेको कर्णाली स्वास्थ्य विज्ञान प्रतिष्ठान (KAHS) ले आफ्नो आगामी यात्रालाई थप जनमुखी र प्रभावकारी बनाउन बृहत् सर्वपक्षीय छलफल तथा सुझाव संकलन कार्यक्रम सम्पन्न गरेको छ।
प्रतिष्ठानको दिगो विकास र समृद्धिका लागि आयोजित उक्त कार्यक्रममा राजनीतिक दलका प्रतिनिधि, जनप्रतिनिधि, नागरिक समाज, सञ्चारकर्मी र विभिन्न सरोकारवाला निकायहरूको उत्साहजनक सहभागिता रहेको थियो। छोटो अवधिमै चिकित्सा शिक्षामा छलाङ मारेको भन्दै सहभागीहरूले प्रतिष्ठानको प्रशंसा गरेका छन्। कार्यक्रममा
जिल्ला समन्वय समिति जुम्लाका प्रमुख गौरीनन्द आचार्यले विगत ५ वर्षको प्रगतिलाई सुखद मान्दै सुधारका पक्षमा स्पष्ट खाका कोर्न आग्रह गर्नुभयो।
पूर्व राज्यमन्त्री बलबहादुर महतले प्रतिष्ठानको जग बसाल्ने सबैको योगदानको कदर गर्दै आगामी विकासका लागि आफ्नो सदैव सहयोग रहने प्रतिबद्धता व्यक्त गर्नुभयो।
सहभागीहरूले आफ्ना भोगाइ र अनुभवका आधारमा स्वास्थ्य सेवालाई अझ गुणस्तरीय, प्रविधिमैत्री र पहुँचयोग्य बनाउन सुझाव दिएका थिए।
उपकुलपति डाक्टर पुजन रोकायले ”प्राप्त भएका सुझावहरू हाम्रा लागि मार्गदर्शक हुन्। हामी यी सुझावहरूलाई गम्भीरतापूर्वक कार्यान्वयन गर्दै सेवालाई थप उत्तरदायी र जनमुखी बनाउनेछौँ।”
कार्यक्रममा प्रतिष्ठानका तर्फबाट हालसम्मका उपलब्धि र आगामी चुनौतीबारे कार्यपत्रहरू प्रस्तुत गरिएको थियो।
शिक्षाध्यक्ष डा. डबलसिंह धामीले प्रतिष्ठानले सञ्चालन गरिरहेका शैक्षिक कार्यक्रम र विद्यार्थीहरूको अवस्थाबारे जानकारी दिनुभयो। नर्सिङ निर्देशक सविना थापाले स्वास्थ्य सेवाका प्रयास, उपलब्धि र सम्भावना समेटिएको प्रतिवेदन प्रस्तुत गर्नुभयो।
रजिष्ट्रार लक्ष्मी महतले सहभागीहरूलाई धन्यवाद दिँदै प्रतिष्ठानले कर्णालीको स्वास्थ्य अवस्था सुधारका लागि सर्वपक्षीय सहकार्यलाई प्राथमिकता दिने बताउनुभयो।
यो कार्यक्रमले प्रतिष्ठान र समुदायबीचको सम्बन्धलाई थप मजबुत बनाएको छ भने कर्णालीमा गुणस्तरीय स्वास्थ्य सेवा र चिकित्सा शिक्षाको भविष्यलाई झन् उज्ज्वल बनाउने संकेत दिएको छ।
