गुठिचौर, जुम्ला पाठेघरको मुखको क्यान्सरको जोखिम कम गर्न जुम्लाको गुठिचौर गाउँपालिकाले विशेष अभियान सुरु गर्ने भएको छ। आगामी १० र ११ गते पालिकाभित्रका १० देखि १४ वर्ष उमेर समूहका किशोरीहरूलाई एचपिभी (HPV) खोप लगाइने तयारी पूरा भएको छ।
स्वास्थ्य शाखा प्रमुख रमेश बुढाका अनुसार पालिकाका वडा नम्बर १ देखि ५ सम्मका कुल ७७ जना किशोरीहरूलाई यो खोप प्रदान गरिने लक्ष्य राखिएको छ।
शाखा प्रमुख बुढाले किशोरीहरूको जीवन सुरक्षाका लागि यो खोप अत्यन्तै प्रभावकारी रहेको बताउँदै कोही पनि नछुटुन भनेर “खोजेरै खोप लगाउने” रणनीति अपनाइएको जानकारी दिनुभयो।
”हामीले ७७ जना किशोरीको तथ्याङ्क लिएका छौँ, तर कोही नछुटुन् भनेर १०% बढी खोपको मौज्दात मगाएका छौँ,” बुढाले भन्नुभयो। “आधारभूत स्वास्थ्य चौकी र स्वास्थ्य चौकीहरूलाई गाउँ-गाउँमा खोजी गरेर भए पनि सबैलाई समेट्न निर्देशन दिइएको छ।”
खोप कार्यक्रमलाई सहज बनाउन विद्यालय र खोप केन्द्रहरूलाई प्राथमिकतामा राखिएको छ। वडा नम्बर १ देखि ५ सम्मका विभिन्न विद्यालयहरूमा र खोप केन्द्र पाइने भएको छ ।
पालिकाभित्रका खड्गदेवी माध्यमिक विद्यालय, शंकर बहुउद्देश्यीय विद्यालय, श्री माध्यमिक विद्यालय, त्रिभुवन माध्यमिक विद्यालय, सत्यवादी माध्यमिक विद्यालय, कालिका आधारभूत विद्यालय र हिरा धनञ्जय आधारभूत विद्यालय (गुठीगाउँ) अध्ययनरत छात्रालाई लगाइने भएको छ।
किन लगाउने एचपिभी खोप?
पाठेघरको मुखको क्यान्सर महिलाहरूमा हुने घातक रोगहरूमध्ये एक हो। सानै उमेरमा यो खोप लगाउँदा भविष्यमा हुनसक्ने क्यान्सरको जोखिमलाई न्यून गर्न सकिन्छ। स्वास्थ्य शाखाले यो खोप सुरक्षित र प्रभावकारी रहेकाले ढुक्क भएर आफ्ना छोरीहरूलाई नजिकैको खोप केन्द्र वा विद्यालयमा लैजान अभिभावकहरूलाई विशेष आग्रह गरेको छ।
