जुम्ला । जुम्लाको कनकासुन्दरी गाउँपालिकामा एक वृद्धाको रहस्यमय ढङ्गले मृत्यु भएको छ। कनकासुन्दरी–४ साहुँबाडा निवासी ७० वर्षीया महेश्वरा सुनारको गम्भीर चोटपटक लागेको अवस्थामा उपचारका क्रममा मृत्यु भएको हो।
जिल्ला प्रहरी कार्यालय जुम्लाका अनुसार महेश्वरा सुनार आफ्नै घरमा रगताम्मे र गम्भीर घाइते अवस्थामा भेटिएकी थिइन्। उनलाई उपचारका लागि कर्णाली स्वास्थ्य विज्ञान प्रतिष्ठान शिक्षण अस्पताल पुर्याइएको थियो। बिहान ८:१० बजे अस्पताल पुर्याइएकी सुनारलाई चिकित्सकले बिहान ९:४५ बजे मृत घोषणा गरेका थिए। प्रहरी निरीक्षक निर्देश बरालका अनुसार मृतकको टाउको र आँखामा गम्भीर चोट देखिएको छ।
मृतकका आफन्त धिरबहादुर वडले कसैले धारिलो हतियार प्रहार गरी घाइते बनाएर घरमै छाडेको अवस्थामा छिमेकीले फेला पारेको बताएका छन्। टाउकोमा गहिरो घाउ र आँखामा समेत चोट देखिएकाले यो सामान्य दुर्घटना नभई हत्या हुनसक्ने आशंका गरिएको छ।
घटनाको संवेदनशीलतालाई ध्यानमा राख्दै अनुसन्धानलाई तीव्र पारिएको छ। प्रमुख जिल्ला अधिकारी दीपक पौडेलका अनुसार,घटनाको सत्यतथ्य बुझ्न प्रहरी निरीक्षक लोकेन्द्र अधिकारीको नेतृत्वमा एक विशेष टोली घटनास्थल पुगिसकेको छ।
प्रहरीले स्थानीयसँग सोधपुछ र प्रमाण संकलन कार्य सुरु गरेको छ।
अहिलेसम्म घटनामा संलग्न कोही पनि पक्राउ परेका छैनन्। प्रहरीले घटनालाई ‘रहस्यमय’ मान्दै गम्भीरताका साथ अनुसन्धान अघि बढाएको जनाएको छ।
