राम प्रकाश विक,जुम्ला, मंसिर १४ गते । जुम्लाको तातोपानी गाउँपालिका–१ राँका गाउँमा घाँस काट्ने क्रममा एक महिलाको ज्यान जाने दुःखद घटना भएको छ। दिउँसो १२ बजेतिर मसिनापाखा सामुदायिक वन जंगलमा घाँस काट्ने क्रममा अन्दाजी ५० वर्षकि गौमति सार्कीको भीरबाट लडेर मृत्यु भएकी हुन्। जिल्ला प्रहरी कार्यालय जुम्लाका डिएसपी रबिनबाबु रेग्मीका अनुसार सार्की करिब २ सय मिटर तल झरेकी थिइन् र घटनास्थलमै प्राण गुमाएका थिइन्। यस्तै उनीसँगै घाँस काट्न पुगेकी लक्ष्मी कठायतले दुर्घटना भएको क्षण प्रत्यक्ष देखेकी बताइन्।
“उहाँ असन्तुलित भएर चिप्लिनुभयो, म चिच्याउँदै छेउ समात्न दौडिएँ, तर केही गर्न सकिनँ,” कठायतको भनाइ छ। ग्रामीण भेगका महिलाले घाँस संकलनमा निर्भर रहनुपरेको यथार्थसँगै जोखिमपूर्ण भू–भागमा हुने यस्ता घटनाले पुनः सुरक्षा चुनौती उजागर भएको छ।
