जुम्ला । प्रधानमन्त्री सुशीला कार्की कर्णाली प्रदेशको मुगु हुँदै आज (बिहीबार) जुम्ला आइपुग्ने हुनुभएको छ। रारा तालको अवलोकन पश्चात् उहाँ दिउँसो जुम्ला ओर्लने कार्यतालिका रहेको छ।
प्रधानमन्त्री सुशीला कार्की दिउँसो १२:०० देखि १:०० बजेको बीचमा आउनुहुने भएको छ। जुम्लाको नम्बर २४ बाहिनी अड्डामा अवतरण गर्नुहुने भएको छ।
उहाँको बसाइ बिहीबारको रात जुम्लामै बस्ने कार्यक्रम तय भएको छ।
प्रमुख जिल्ला अधिकारी दीपक पौडेलका अनुसार प्रधानमन्त्रीको यो भ्रमण पूर्ण रूपमा अनौपचारिक रहनेछ। उहाँले भन्नुभयो ”कुनै औपचारिक कार्यक्रम तय गरिएको छैन। मुगुबाट आएपछि बाहिनीमा आराम गर्ने र सम्भव भएसम्म कर्णाली प्राविधिक शिक्षालयको भ्रमण गर्ने योजना छ। यद्यपि, यो कार्यतालिकामा सामान्य फेरबदल हुन सक्छ।”
प्रधानमन्त्री कार्कीले शुक्रबार बिहान प्रसिद्ध चन्दननाथ मन्दिरको दर्शन गर्ने र त्यसपछि मात्र राजधानी फिर्ता हुने कार्यक्रम रहेको बुझिएको छ। प्रधानमन्त्रीको सुरक्षा र स्वागतका लागि स्थानीय प्रशासन तथा सुरक्षा निकायले आवश्यक तयारी पुरा गरिसकेको २४ बाहिनी अड्डा जुम्लाले जनाएको छ।
